Turqia është bërë skuadra e dytë që eliminohet nga Botërori 2026, pas dy humbjeve në dy ndeshjet e para të fazës së grupeve.
Pas disfatës 1:0 ndaj Paraguait në orët e hershme të së shtunës, kombëtarja turke humbi çdo shans për kualifikim në fazën eliminatore. Më herët, Turqia ishte mposhtur edhe nga Australia me rezultatin 2:0.
Pas eliminimit, ylli i Real Madridit, Arda Guler, nuk e fshehu zhgënjimin dhe kërkoi falje publike për tifozët turq.
“Jemi vërtet, vërtet të trishtuar. Kjo është gjithashtu e turpshme dhe u kërkojmë ndjesë tifozëve tanë. Jemi jashtëzakonisht të zhgënjyer. Nuk di si t’i shpreh ndjenjat tona”, deklaroi 21-vjeçari.
Turqia kishte hyrë në Botëror me pritshmëri të mëdha, por dështoi të marrë qoftë edhe një pikë në dy ndeshjet e para, duke i dhënë fund para kohe aventurës në turneun më të madh të futbollit.
Megjithëse është eliminuar, përfaqësuesja turke do ta zhvillojë edhe ndeshjen e fundit të Grupit D, ku më 26 qershor do të përballet me Shtetet e Bashkuara të Amerikës.
Eliminimi i hershëm i Turqisë konsiderohet një nga zhgënjimet më të mëdha të deritanishme në Botërorin 2026, ndërsa deklarata e Guler pas ndeshjes pasqyroi qartë gjendjen e rënduar brenda kampit turk.
